Empresas de Traballo Temporal

Denomínase empresa de traballo temporal aquela que a súa actividade consiste en por a disposición de outra empresa usuaria, con carácter temporal, traballadores por ela contratados. A contratación de traballadores para cedelos temporalmente a outra empresa so poderá efectuarse a través de empresas de traballo temporal debidamente autorizadas.

AUTORIZACIÓN DE EMPRESAS DE TRABALLO TEMPORAL

As persoas físicas o xurídicas que pretendan realizar a actividade de empresa de traballo temporal deberán obter autorización administrativa previa da autoridade laboral competente.

A autorización terá unha validez dun ano e prorrogarase por dous períodos sucesivos iguais, sempre que se solicite con unha antelación mínima de tres meses á expiración de cada un de ditos períodos e a empresa cumprira as obrigacións legalmente establecidas. A autorización concederase sen límite de duración cando a empresa de traballo temporal realice a súa actividade durante tres anos, en base ás autorizacións correspondentes.

Requisitos que teñen que cumprir para poder obter a autorización:

• Dispor dunha estrutura organizativa que lle permita cumprir as obrigacións que asume como empregador en relación co obxecto social. Para valorar a estrutura terase en conta factores tales como a dimensión, equipamento e réxime de titularidade dos centros de traballo; o número, dedicación, cualificación profesional e estabilidade no emprego dos traballadores contratados para prestar servizos baixo a dirección da empresa de traballo temporal; e, o sistema organizativo e os procesos tecnolóxicos utilizados para a selección e formación dos traballadores contratados para a súa posta a disposición en empresas usuarias.
• Dedicarse exclusivamente á actividade constitutiva de empresa de traballo temporal.
• Carecer de obrigacións pendentes de carácter fiscal ou de Seguridade Social.
• Constituír unha garantía, a disposición da autoridade laboral que conceda a autorización administrativa, que responderá das débedas por indemnizacións, salariais e de Seguridade Social.
  A garantía poderá consistir en:
  • a. Depósito en diñeiro efectivo ou en valores públicos na Caixa Xeral de Depósitos ou nas súas sucursais.
  • b. Aval ou fianza de carácter solidario prestado por un Banco, Caixa de Aforros, Cooperativa de Crédito, Sociedade de Garantía Recíproca ou mediante póliza de seguros contratada ao efecto.
    Importe da garantía: Igual a vente e cinco veces o salario mínimo interprofesional, en cómputo anual, para os traballadores desde dezaoito anos, vixente no momento de presentar a solicitude.
• Que non fose sancionada con suspensión de actividade en dous ou mais ocasións.
• Incluír na súa denominación os termos “empresa de traballo temporal”

CONTRATOS DE POSTA A DISPOSICIÓN

O contrato de posta a disposición é o celebrado entre a empresa de traballo temporal e a empresa usuaria tendo por obxecto a cesión do traballador para prestar servizos na empresa usuaria.

Comunicación á Autoridade Laboral:
O empresario ten a obriga de remitir á autoridade laboral que concedeu a autorización e no modelo que figura a continuación, unha relación dos contratos de posta a disposición celebrados no mes anterior.
Modelo de relación de contratos de posta a disposición.(enlace)
Prazo de comunicación: Dentro dos 10 primeiros días de cada mes
Dita comunicación remitirase igualmente no caso de que a empresa non formalizase contratos de posta a disposición, facendo constar tal circunstancia.

OBRIGACIÓN DE INFORMACIÓN Á AUTORIDADE LABORAL

Ademais da comunicación dos contratos de posta a disposición celebrados, a empresa de traballo temporal tamén deberá informar á autoridade laboral sobre:

• Os cambios de titularidade e de enderezo da empresa
• O cambio das persoas que ostenten cargos de dirección ou sexan membros dos órganos de administración nas empresas que revistan a forma xurídica de sociedade, indicando os seus datos identificativos.
• A apertura ou o peche de centros de traballo
• O cese na actividade como empresa de traballo temporal.

Prazo de comunicación: Dentro dos 15 días seguintes a súa produción ou, no seu caso, notificación da súa inscrición no correspondente Rexistro Mercantil ou Rexistro de Cooperativas.

LISTAXE DE EMPRESAS DE TRABALLO TEMPORAL

Listado de empresas de traballo temporal autorizadas polo Ministerio de Traballo e Inmigración

NORMATIVA

• Lei 14/1994, de 1 de xuño, pola que se regulan as empresas de traballo temporal. (BOE nº 131, de 2 de xuño de 1994).
• Lei 29/1999, de 16 de xullo, pola que se modifica a lei 14/1994, de 1 de xuño, pola que se regulan as empresas de traballo temporal. (BOE nº 170, de 17 de xullo de 1999).
• Real decreto 4/1995, de 13 de xaneiro, polo que se desenvolve a lei 14/1994, de 1 de xuño, pola que se regulan as empresas de traballo temporal. (BOE nº 27, de 1 de febreiro de 1995).

ONDE ACUDIR

Consellería de Traballo e Benestar
Dirección Xeral de Relacións Laborais
Subdirección Xeral de Traballo
Servizo de Relacións Laborais
Edificio Administrativo San Lázaro, s/n
15781  Santiago de Compostela
Tel.: 981 545 743
Fax: 981 957 751

• Modelo de solicitude de autorización para actuar como ETT
• Modelo de relación de contratos de posta a disposición